OROSCOPO VERONESE
Ligaor
dal 21 Marso al 20 April
Pianta: Fenocio selvadego
Posto fortunà: Sengia Rossa
Color: Verdezon
Descrision: Te si na persona che ga bisogno de azzion: te ghè sempre oja de moverte, de far brigar, col
diaolo nel cul; te piase eser indipendente e te dà fastidio se i te comanda. Rabioso, te piase dominar in
situazioni dificili e te ghè un saco de iniziative ... ma còntenela tuta ... te si mia bon de portar a termine
propio tuti i mesteri che t’è invià! Proa a finir quei pitosto che scominçiarde altri çento! Te vol far sempre tuto
in presia e de testa tua, candalostia. A olte te manca anca quel s-ciantin de tatto che in certe situasioni el te
vegnaria bon: ma no l’è mia colpa tua, puareto, l'è che no te te ne incorzi mia. Te godi spesso de bona
salute ma, anca se te ghè energia a buso, te pol patir par i to ecessi. Bei manco goti.
Tricheco
dal 21 April al 20 Majo
Pianta: Capusso
Posti fortunà: Amsterdam e Pelaloco
Color: Sedano
Descrision: Te si realista, tenace, sucon e posessivo. Un pochetin spacamaroni a dirla qua. Te si anca lento
e te tendi a eser pigro, ma te ghè anca pazienza da vender e prima de far calcosa te ghe pensi sempre do
olte. Te podaresi anca pensar de manco che te faria altro che ben. Tegnisso, te ghè un spicato senso de
l'economia e el dono de saver tegner da conto i schei. Quando te vol ofrir ti, te tiri fora i scheolini come se te
avesi apena spacà la musina, e a forsa de far la mossa te ghè la scarsela sliza. Se i te fa i complimenti no te
te lasi abindolar facilmente parché te si na persona semplice e conservativa. Te piase impuntarte quando te
pensi de averghe rezon, te ghè bona memoria, par quela quando te perdi calcosa te lo cati subito senza dir i
“se-queri”. Te ghè un gran magnetismo nei confronti del sesso opposto, ma ocio a no stufar: a star masa
tacà a le cotole te podaresi sgionfar.
Fagian
dal 21 Majo al 21 Giugno
Pianta: Brusaocio
Posto fortunà: Sotoscala
Color: Blu azteco
Descrision: Te piase metar el naso dapartuto e saver tante robe ma a dirla tuta te si un pochetin superficiale
e no te vè mai a fondo in quel che te sè. Ciacolon, te parli come na machineta, te ghè na bona dialetica che
spesso la te salva e la te giuta a mascarar se a olte no te si bon da njente. Te si intuitivo e rapido nel
rivarghe ma spesso te ghè furia de conoser tuto in presia. Ma farte i cavoli tui no, vera!? Se te si dòna mejo
par ti, se te si omo...te si come na dona parchè te riesi a far e organizar tante robe in un colpo solo. Te piase
inpenir la Setimana enigmistica fin a l’ultimo buso, quasi come un bidel, ma anca star fora a zugar a balon.
Te patisi masa de nervosismo: metete chieto na s-cianta: ciapete dei momenti de riflesion solo par ti e
metete a lezer Selezione.
Léoro
dal 22 Giugno al 22 Lujo
Pianta: Fior del Cuco
Posti fortunà: Engazzà e Abkazia.
Color: Maron
Descrision: Te si sensibile e un tipo emotivo. Te piase ndo te si nato, ndo te vivi e te si tacà a le to raìze e a
la to famea, a le vecie abitudini. Te si capricioso come la pizza, volubile come na sposeta: a colpi te si da ovi
e a colpi da late. Spesso te ven le malinconie e paturnie, parchè te parli sempre del to pasato e de la to
famea, e alora te fe star zo el fià. Te gavarè anca na bona memoria ma te podaresi anca cambiar discorso
na bona olta! Te si ambizzioso ma mai sfaciato. Brao, le to robe tentele par ti. Sicome te si un segno de
acua, te ghè bisogno de moverte parchè te ghè masa retenzion. Serca de cambiar stile de vita, variar anca
el menu. Pètela lì de magnar el ton sgrafando la scatoleta col piron e dopo pociarghe anca l pan vecio!
Pito
dal 23 Lujo al 22 Agosto
Piante: Ràvani e naòni
Posti fortunà: Kirghizistan e Brigafata
Color: Blu carta da sucaro
Descrision: El to ègo l'è grando come un balon, ma varda che nol s’ciopa; te piase star al centro de
l'atenzion ma te ghè da pensar che no te si mìa el buso del cul del mondo! Te si orgoglioso e te piasaria eser
el meo de la coà in ogni circostanza ... pecà che no la podarà mai esar tuto come te vol ti. E sta atento
quando i te fa i complimenti che te te godi masa. No sta cascarghe a tuto quel che i te conta. Te piase
comandar e organizar. Te tendi sempre a darghe a chialtri el laoro manco importante. Sicome el to segno el
governa el cor, te podaresi esar fortunà in amor ma anca patir de disturbi cardiaci quando te sarè vecio
stracampio. Caro mio, a se pol mia averghe ovo, galina e cul caldo!
Volpin
dal 23 Agosto al 22 Setembre
Pianta: Erba spagna
Posto fortunà: Volpino di Zimella
Color: Verdezin
Descrision: Te si na persona altruista, de cosienza e te piase far i to laoreti da perfetin anca se questi jè
complicà e pieni de ostacoli. Cosita te si in grado de portar a termine tuti i mestieri che i te asegna parchè te
piaze che tuto sia perfeto. Te podaresi moderar però la to critica che l'è masa esagerata e la fa vegner el
late ai zenoci. Se pol mia esar tutti perfezionisti come ti! Corrèto verso l'altro sesso, no te si un caciator nato
ma te pensi e ripensi assè prima de decider se tarmar na tipa(-o) o no. Molete fora na nina, te faria ben. Se
anca la te dise de no, no te perdi mìa le virtù! Dominà da Mercurio te si anca nervoseto e te acusi problemi a
la digestion. Te ghè da finirla de ndar a magnar al mecdonal anca a mezogiorno.
Bogon
dal 23 Setembre al 23 Otobre
Pianta: Camomila
Posto fortunà: Valacchia e Valese
Color: Tera de Siena brusà
Descrision: Te ghè svilupà un gran senso de l'estetica e te çerchi sempre l'equilibrio in tante robe: l'arte de la
diplomazzia la t’è innata. Coi butei te si simpatico, piazoso, te çerchi sempre de comportarte drito e de no
averghe pregiudizzi. No te piase mia star lì in un canton da par ti, e te fe de tuto par scapolar da un
eventuale isolamento. Se te si dòna te si elegante, rafinata e bela stropa, se te si omo te piaze sercar un
amor stabile, sicuro. Te si anca tacà ai schei e al suceso ma se capise che no te pol mia esar senpre tuto
belo ti e mèr...coli chialtri; infati se te ghè qualche disturbo, jè de natura psicosomatica e ai reni. Ciapa e
porta a casa.
Sìmezo
dal 24 Otobre al 21 Novembre
Pianta: Ortiga
Posto fortunà: A&O e Rutenia occidentale
Color: Ceruleo
Descrision: Te ghè un caratere ingropado assè. Te si dominà da profondi impulsi emotivi, te si pien de
risorse e te ghè un gran magnetismo fisico. Te si na persona pasional e el to segno l'è sicuramente el più
sensual del zodiaco. El to pianeta dominante l'è marte. Te manca un pel de tatto difati spesso capita che te
ofendi qualcheduni e dopo quando sto qua el se insusta te te sorprendi de averlo fato. Te si invià a çercar un
to model de vita: un principio par cui viver o na strutura de vita da seguir. Par questa motivazzion te si
integro, ma qualkedun pol scambiarte per “intiéro”... No te aceti compromesi e te si un poco individualista.
Così spesso te vè in acido, va ben che te lo fe par autodifesa ma çerca de limitar l'acidità, te farà solo che
ben. Tote un alka-selzer.
Musso
dal 22 Novembre al 21 Dicembre
Pianta: Pisacan
Posto fortunà: Rep. Pop. Dem. del Laos e Cadjopi
Color: Vermiglione
Descrision: Esuberante, otimista, pien de vita e de fiducia e che dise le robe in facia: queste jè le doti
fondamentali del Muso. Te piaze far sport e viajar e averghe pi che altro na vita aventurosa, par questo
motivo i nati de sto segno jè destinè a maridarse più de na olta. Opure i preferise restar da soli come un can,
pur de far tuto senza gnisuni tra i pie' (no savì che ben ke stè!). Dotè de gran intuizzion, jè atirè e interessà a
tute le filosofie, religioni o altre robe che i pensa che le slarga la conosenza che ghe piase. Generalmente
stè sani come un coral, ma i vostri punti deboli jè le anche e el fegato, de conseguenza gavì da ridùr i goti, e
far manco ulaop che no va gnente ben par le anche malcunse.
Carbonasso
dal 22 Dicembre al 19 Genàr
Pianta: Sambugar
Posto fortunà: Ponzilovo
Color: Senape
Descrision: Te si responsabile, afidabile e riservato: te preferisi tegnerte par ti i to problemi e a l'inizio no te
fè na gran impresion...te pari strànio e muson! Ma invezze te si ambizioso e te ghè gran pazienza, e alora
per rivar a le mete prefise te ghè corajo de percorer camini longhi assè, conosendo le persone giuste che te
pol giutar in quel che te vol. Tajon, no te piase l'esibizionismo masa acentuà, e te piaze creder in qualcosa
... parchè na volta rivà al traguardo, se no ghè altri a ci domandarghe te necesiti de introspezzion. Sucon, a
olte te pararesi anca masa testa da porton, ma l'è solo parché te perserveri nei to obietivi. Te governa
Saturno e sicome l'è anca el pianeta dei ossi, i nati de sto segno i pol patir de reumatismi e artrosi. De solito
el to fisico el se irobustise col pasar dei ani, no sta’ preocuparte quindi se te si ancora zoeno e magro come
un ciodo. Ghè tempo, un po’ a la olta se maura anca le nespole su la nespolara.
Anara
dal 20 Genàr al 18 Febrar
Pianta: Bruscànzolo
Posto fortunà: Giarela
Color: Griso nebia
Descrision: Te si na persona anticonvenzionale, original che te piase far le robe da par ti solo. Te capisi i
problemi de chialtri pur restando distacà. Brao, in un certo senso te si bon de farte i afari tui. Dominà da
Urano, te si un tipo e na tipa che ga bisogno de libertà e indipendenza e te riesi sempre a risolvar al mejo i
raporti basè su l'amicizia. (Pi assè complicà se invezze parlemo de amor.) Te senti el bisogno de averghe
amici ma te si bon anca de star da par ti quando te vol. Come tuti i segni de aria te si alquanto inteletuale,
ma piassè de chialtri te si profondo: te credi nei canbiamenti e te piase baterte per afermar le to razon o
anca par el ben de la coletività. Eh, rilàsete che no te si mia Hulk. Te si avanti, te si quel da le bele nove. De
solito te si onesto e fedele e te godi de bona salute. Semai qualche problemin te ghe l’è ne la circolazion de
le gambe. Invezze de far sempre el sponsin dopo disnar, ciapa la bicicleta e pedala.
Pegora
dal 19 Febrar al 20 Marso
Pianta: Grassa
Posto fortunà: Stati Federati di Micronesia
Color: Fucsia
Descrision: Te si na persona molto sensibile e emotiva. Forse anca masa influenzabile dai to amici e da
l'ambiente ndo te stè, sia in ben che in mal. Sicome te si comprensivo e te credi che tuti i sia boni come ti, te
si predisposto a la dedizzion e al sacrificio verso el prosimo. Amor, svejete, chè al mondo de gente carogna
ghe n’è un fodro. No te si mìa masa competitivo, te piase le materie artistiche parchè te ghè un potenziale
creativo pitosto alto. Te si anca intuitivo. Vulnerabile e molesin, te pechi de mecanismi de autodifesa e te si
anca emotivamente instabile. Per quela te patisi, oltre che de disturbi ai piè, de malesseri psicosomatici
coleghè all'emotivita'. Se te interesa gavaria el numaro de un brao psicanalista.
Nessun commento:
Posta un commento